Sentyabrın 18-i Azərbaycan musiqi mədəniyyətimizin korifeyi Üzeyir bəy Hacıbəyovun doğum günüdür.
Üzeyir Hacıbəyov 1908-ci il yanvarın 18-də «Leyli və Məcnun» operasını tamaşaya qoymaqla təkcə Azərbaycanda deyil, bütün müsəlman Şərqində opera sənətinin əsasını qoymuşdur. O, həm də Azərbaycanda musiqili komediya janrının yaradıcısıdır.
Ü. Hacıbəyov milli musiqi xəzinəsini yeni janr və formalarla zənginləşdirən bir sıra əsərlər, o cümlədən dünya musiqi xəzinəsinin incilərindən olan «Koroğlu» operasını bəstələmişdir.
O, həm Azərbaycan Xalq Cümhuriyyəti, həm də Azərbaycan Respublikasının Dövlət himnlərinin musiqisinin müəllifidir. Üzeyir bəy elmi musiqişünaslığın, musiqi təhsilinin əsasını qoymuş və ömrünün sonunadək musiqi mədəniyyətinin inkişafına rəhbərlik etmişdir.
Ölməz bəstəkar Üzeyir Hacıbəyov 23 noyabr 1948-ci il tarixində 63 yaşında vəfat etmişdir.