Elmi Şuranın sədri, ADRA-nın rektoru, Xalq rəssamı, professor Natiq Əliyev iclası açıq elan edərək, iclasın gündəliyində duran məsələləri şura üzvlərinin diqqətinə çatdırıb.

İlk növbədə Xalq rəssamı, professor Tofiq Ağababayevin 95 və Xalq rəssamı, professor Fuad Salayevin 80 illik yubileyi münasibətilə təbrik oxunub, onların yüksək səviyyəli kadrların hazırlanmasında göstərdikləri xidmət xüsusi vurğulanıb. Şura üzvləri öz növbəsində ADRA-nın rektoru, Xalq rəssamı, professor Natiq Əliyevi 65 illik yubileyi münasibətilə təbrik edərək, onun geniş diapazona malik yaradıcılığını milli heykəltaraşlıq sənətimizin inkişafına həsr edən dəyərli sənətkar olduğunu bildiriblər. Bütün yubiliyarlara can sağlığı, fəaliyyətlərində uğurlar arzulanıb.

İclasda Gürcüstanın Tiflis şəhərində TASA – Memarlar və Heykəltəraşlar Asossasiyasının təşkilatçılığı ilə “Heykəltəraşlıq Festivalı” çərçivəsində ADRA-nın heykəltəraş tələbələrinin qazandığı uğurlar xüsusi vurğulanıb. Sərgidə I yerin qalibi Nuridə İsmayılova, II yerin qalibi Zaur Qəhrəmanov və digər iştirakçılar Elmi Şuranın iclasına dəvət olunaraq şura üzvləri tərəfindən təbrik edildilər. ADRA-nın rektoru, Xalq rəssamı, professor Natiq Əliyev tərəfindən qaliblərə qazandıqları qızıl və gümüş medallar təqdim olunub.

Elmi şurada Azərbaycan Dövlət Rəssamlıq Akademiyası ilə Özbəkistan Milli Rəssamlıq və Dizayn İnstitutu arasında bağlanmış müqavilə və bunun əsasında gələcək planlar barədə iştirakçılara məlumat verilib. Həmçinin ADRA-nın rektoru səfər zamanı Azərbaycan Milli İncəsənət Muzeyinin direktoru Çingiz Fərzəliyevin “Sevinc piyaləsi” adlı fərdi sərgisinin açılması münasibətilə təbrik edib. O da öz növbəsində sərgidə nümayiş olunmuş əsərlərin kataloqunu şura iştirakçılarına çatdırdı.

Həmçinin Əməkdar incəsənət xadimi, professor Çingiz Fərzəliyev yeni işıq üzü görmüş “Əzim Əzimzadə” kitabını ADRA-nın kitabxanasına təqdim edib.

İclasda şuranın gündəliyində nəzərdə tutulan məsələlərlə bağlı müxtəlif təqdimatlar olub və ADRA-nın gələcək fəaliyyəti barədə müzakirələr aparılıb. Tədrislə bağlı bir sıra məsələlər müzakirə olunub. Rektor çıxışı zamanı ADRA-nın qarşısında duran məsələlər barədə söhbət açaraq, öz fəaliyyəti dövründə gördüyü işlər barədə şura üzvlərinə məlumat verib.

Elmi Şurada Ümummilli Lider Heydər Əliyevin və alim-oftalmoloq, akademik Zərifə Əliyevanın 100 illik yubileylərinə həsr olunmuş elmi konfrans və sərgidən bəhs olunub. Bildirilib ki, bu münasibətlə ADRA-da silsilə tədbirlər davam edəcəkdir.

Yekunda müzakirə edilən məsələlərlə bağlı ümumi səsvermə ilə yekdil qərar qəbul olunub. İclasın sonunda ADRA-nın rektoru, Elmi Şuranın sədri, Xalq rəssamı, professor Natiq Əliyev Şura üzvlərinə tapşırıq və tövsiyyələrini verib.